Një grup motoçiklistësh nacionalistë nga Serbia është ndaluar nga autoritetet e Kosovës dhe nuk është lejuar të hyjë në territorin kosovar. Sipas informacioneve paraprake, grupi u ndal në pikën kufitare pasi gjatë lëvizjes së tij ka bërë thirrje provokuese me përmbajtje nacionaliste, përfshirë sloganin “Kosova është Serbi”.
Ngjarja ka shkaktuar reagim nga autoritetet e sigurisë në Kosovë, të cilat vendosën të mos lejojnë kalimin e grupit në territorin e vendit. Incidenti vjen në një periudhë kur marrëdhëniet mes Kosovës dhe Serbisë vijojnë të jenë të tensionuara, ndërsa më herët janë regjistruar edhe përplasje verbale mes zyrtarëve të të dyja vendeve.
Deri më tani nuk ka pasur një reagim zyrtar nga autoritetet serbe lidhur me ndalimin e motoçiklistëve. Autoritetet kosovare pritet të japin më shumë detaje në lidhje me arsyetimin ligjor të vendimit dhe rrethanat e plota të incidentit.
