Këshilli Kombëtar i Partisë Demokratike ka përfunduar në orët e para të mëngjesit të së enjtes procesin e votimit për zgjedhjen e Sekretarit të Përgjithshëm, nënkryetarëve, drejtuesve të sekretariateve dhe anëtarëve të Komisionit të Apelimit. Flamur Noka është rikonfirmuar në postin e Sekretarit të Përgjithshëm, pasi mori 184 vota përballë deputetit Saimir Korreshi, i cili siguroi 84 vota. Kandidatura e Korreshit u bë publike vetëm në momentet e fundit, ndërsa vetë ai deklaroi se vendimi për të kandiduar ishte marrë pikërisht ditën e zgjedhjeve. Procesi u zhvillua mes debatesh të forta, pasi gjatë mbledhjes së një dite më parë anëtarja e Këshillit Kombëtar, Ilirjana Kuçana, e cilësoi rikandidimin e Nokës si një "fenomen që duhet luftuar", duke iu drejtuar drejtpërdrejt kryetarit të PD-së, Sali Berisha. Paralelisht, Gazment Bardhi mbetet kryetar i Grupit Parlamentar të PD-së, ndërsa Agron Gjekmarkaj vijon të mbajë detyrën e nënkryetarit.
Në garën për nënkryetarë u konfirmuan Belind Këlliçi, Nikola Kedhi dhe Erisa Bajaziti. Këlliçi fitoi përballë Luçiano Boçit me rezultatin 177 vota ndaj 113, ndërsa në garën tjetër Nikola Kedhi triumfoi ndaj Jonathan Panos, duke marrë 174 vota kundrejt 101. Erisa Bajaziti u zgjodh nënkryetare si përfaqësuese e diasporës, pasi siguroi 193 vota, ndërsa rivalja e saj Besa Manaj mori 69 vota. Ndërkohë, Klevis Balliu, i cili kishte zhvilluar fushatë për postin e nënkryetarit, u zgjodh Sekretar Organizativ, duke zëvendësuar Ervin Minarollin dhe fituar garën ndaj Agron Lokës.
Këshilli Kombëtar miratoi gjithashtu përbërjen e plotë të sekretariateve të reja të Partisë Demokratike. Andi Mustafaj u zgjodh Sekretar për Burimet Njerëzore, Marash Logu Sekretar për Çështjet Ligjore dhe Zgjedhore, Viola Kapedani Sekretare për Marrëdhëniet me Publikun, Eva Metaj Sekretare për Organizatat Partnere dhe Shoqërinë Civile, Fjoralba Dizdari Sekretare për Integrimin Evropian, Ethem Aga Sekretar për Emigracionin dhe Diasporën, Etion Kapedani Sekretar për Dixhitalizimin, Gentian Kaprata Sekretar për Infrastrukturën dhe Territorin, Endira Bushati Sekretare për Çështjet e Pronave dhe Luftën kundër Korrupsionit, Franc Nuri Sekretar për të Drejtat e Njeriut, Shkëlqim Lepenica Sekretar për të Përndjekurit Politikë, Ylli Asllani Sekretar për Pushtetin Lokal dhe Erges Eskiu Sekretar për Aksionin Qytetar.
Po ashtu u zgjodh edhe përbërja e Komisionit të Apelimit të Partisë Demokratike. Anëtarë të këtij komisioni do të jenë Adriana Kalaja, Besart Logu, Shaqir Manjani, Suina Asllanaj dhe Gentian Koçi. Me përfundimin e këtij procesi, Partia Demokratike ka kompletuar strukturat e saj drejtuese pas votimit të Këshillit Kombëtar, ndërsa rezultatet konfirmuan vijimësinë e shumicës së figurave aktuale në postet kryesore, por edhe emra të rinj në sekretariate dhe në drejtimin e partisë.
