Vijnë përfitimet e para në ekonomi pasi shteti dha 4.2 MLN Euro për Kanye West

Nga Ministria e së Vërtetës.

Qeveria ka shpallur sot një sukses të jashtëzakonshëm të strategjisë së saj më të re makroekonomike. Vetëm pak kohë pasi u mor vendimi vizionar për të mbështetur koncertin e Kanye West me një fond modest prej 4.2 milionë eurosh nga paratë e taksapaguesve, efektet e para pozitive kanë nisur të ndihen drejtpërdrejt në xhepat e qytetarëve.

Sipas ekspertëve të qeverisë, investimi i miliona eurove te një reper miliarder amerikan ishte hapi i duhur për të injektuar "energji pozitive" në tregun vendas. Dhe rezultatet nuk vonuan: siç dëshmohet edhe nga çmimet në pikat e karburantit në vend, nafta ka shënuar menjëherë një rritje të shëndetshme duke kapur shifrën prej 196 lekësh për litër.

"Ky është një triumf i padiskutueshëm i teorisë së investimeve me rrezatim," u shpreh një zëdhënës i qeverisë gjatë një konference për mediat. "Disa skeptikë pyetnin pse duhet t'i jepnim 4.2 milionë euro Kanye-s dhe jo për rrugë, spitale apo shkolla. Por sot përgjigjja është e qartë. Rritja e çmimit të naftës tregon se ekonomia jonë po nxehet dhe se qytetarët tanë tani kanë privilegjin ekskluziv të paguajnë më shumë për të njëjtin produkt, duke u ndier më afër jetës luksoze të yjeve të Hollywood-it."

Sipas analizës zyrtare, rritja e çmimit të karburantit ka disa përfitime të fshehura ekonomike dhe sociale:

• Përmirësimi i shëndetit fizik: Duke pasur naftën më shtrenjtë, qytetarët do të motivohen të ecin më shumë në këmbë, duke kursyer kështu buxhetin e shtetit për shëndetësinë.
• Ekskluziviteti rrugor: Trafiku do të ulet pasi në rrugë do të qarkullojnë vetëm ata që vërtet e vlerësojnë artin e Kanye West dhe mund ta përballojnë atë.
• Rritja e krenarisë kombëtare: Sa herë që një qytetar mbush serbatorin me 196 lekë për litër, ai mund të krenohet se po jep një kontribut të vogël indirekt në karrierën muzikore të Ye.

Qeveria siguroi opinionin publik se ky është vetëm hapi i parë. Nëse ky model rezulton i suksesshëm deri në fund të vitit, projekti i radhës parashikon një pagesë prej 10 milionë eurosh për Taylor Swift, projekt ky që pritet të rritë me sukses edhe çmimin e bukës dhe të dritave.