Gjergj Luca, i njohur publikisht si trafikanti peshkatar dhe pronar biznesesh, ka një dosje të gjatë si bashkëpunëtor i Sigurimit të Shtetit. Sipas dokumenteve të publikuara, ai ka operuar për plot 10 vjet me pseudonimin “Figuranti”, nga mosha 17-vjeçare në vitin 1981 deri në 27 vjeç e 5 muaj në fund të vitit 1991.
Rekrutuar nga i ati, aktori N.L. (një nga 53 ish-bashkëpunëtorët aktivë të sigurimit në trupën e artistëve dhe punonjësve të Teatrit e Kinostudios), Luca ka firmosur deklarata pranimi bashkëpunimi dhe ka raportuar rregullisht për shokët e tij, grupet e rinisë dhe çdo gjë që dëgjonte brenda rretheve ku lëvizte. Ai ka dhënë informacione për të shpëtuar veten nga burgu, duke spiunuar të tjerët. Në një rrëfim të vitit 2023 Luca vetë ka folur për këtë periudhë:
“Babai më mori për krahu dhe më çoi te policia e burgu te ‘Mine Peza’, por gjatë rrugës për atje më tha se ata të policisë e prokurorisë që kishin besim te ai, i kishin thënë që shokët e mi ishin arrestuar dhe duhej të tregoja çdo gjë që kishim bërë bashkë, në të kundërt do të futesha në burg përsëri dhe do t’i nxirrnin me dajak.”
Pas rënies së Sigurimit të Shtetit, “Figuranti” nuk u tërhoq. Në vitin 1992 krijoi lidhje me shefa të SHIK-ut nën maskën e “demokratit” dhe më vonë u përfshi në rrjete trafiku droge, duke pasur angazhime edhe në Greqi.
Sot, bizneset e tij gëzojnë një mbrojtje të veçantë. Kur qytetarët lënë komente negative apo review të ulëta në rrjete sociale, del Skënder Hita dhe policia me “verifikimin” e mbi 10 mijë llogarive. Taksat e qytetarëve po harxhohen për të mbrojtur imazhin e oligarkëve me të kaluar të tillë nga pakënaqësia e konsumatorit të zakonshëm.
Kjo nuk është thjesht një histori e së shkuarës. Është një model se si disa rrjete të vjetra të sigurimit dhe pushtetit kanë gjetur mënyrën për të ruajtur ndikimin edhe në demokracinë e re. Nga informator i regjimit komunist, në biznesmen i mbrojtur nga policia e shtetit – “Figuranti” vazhdon të luajë të njëjtin rol, vetëm skena ka ndryshuar.
Pyetja që mbetet është e thjeshtë: sa kohë do të vazhdojë policia të mbrojë “Figurantët” në vend që të mbrojë qytetarët?
