Eralbi Breçani, djali i ish-zëvendësdrejtorit të Policisë së Tiranës, Erzen Breçani, do të vijojë të qëndrojë në qeli. Apeli i Posaçëm rrëzoi kërkesën e tij për zbutjen e masës së sigurisë “arrest në burg”, duke lënë në fuqi vendimin e mëparshëm të Gjykatës së Posaçme (GJKKO).
Vendimi u shpall nga gjyqtari Dhimitër Lara, i cili nuk pranoi argumentet e mbrojtjes. Breçani u ekstradua nga Spanja drejt Shqipërisë më 13 qershor, pasi kërkohej nga Prokuroria e Posaçme për akuza që lidhen me trafikimin e narkotikëve në kuadër të grupit të strukturuar kriminal dhe pastrimin e parave në bashkëpunim me babanë e tij.
Sipas SPAK, Eralbi Breçani dyshohet se ka qenë pjesë e një grupi kriminal të drejtuar nga Ervin Mata dhe Ergys Dashi, i cili akuzohet për trafikimin e sasive të mëdha të kokainës nga Amerika Latine drejt Europës. Prokuroria ka dokumentuar përmes komunikimeve të dekriptuara në aplikacionin Sky ECC se grupi ka trafikuar 446 kilogramë kokainë drejt Holandës, ndërsa të ardhurat nga aktiviteti kriminal dyshohet se janë pastruar në Shqipëri.
