Ka nisur mbrëmjen e sotme protesta e 38-të qytetare në Tiranë. Ashtu si në ditët e mëparshme, protestuesit u mblodhën fillimisht në Sheshin "Skënderbej", prej nga nisën marshimin drejt godinës së Kryeministrisë.
Nën thirrjet "Edi Rama, o legen, prite popullin se po vjen", "Rama n'burg, Berisha n'burg", "Revolucion" dhe "Ju erdhi fundi", qindra qytetarë po marshojnë në bulevardin kryesor të kryeqytetit, duke kërkuar dorëheqjen e kryeministrit Edi Rama, largimin e klasës së vjetër politike dhe ndryshime të thella në drejtimin e vendit.
Protesta, e cila ka hyrë tashmë në ditën e saj të 38-të radhazi, vijon të mbledhë çdo mbrëmje qytetarë nga Tirana, por edhe nga qytete të tjera të vendit, të cilët shprehin pakënaqësinë e tyre ndaj qeverisjes dhe klasës politike që, sipas tyre, ka dominuar Shqipërinë për më shumë se tre dekada.
Pas mbërritjes përpara Kryeministrisë pritet të mbahen fjalimet e qytetarëve, ndërsa më vonë protesta do të vijojë me marshimin e përnatshëm në rrugët kryesore të Tiranës.
