Një banor i zonës Fermë Çlirim, Fier, ka kontaktuar redaksinë e JOQ Albania, duke denoncuar mungesën e energjisë elektrike për më shumë se tetë orë, si edhe mënyrën e komunikimit që, sipas tij, kanë pasur operatorët e OSHEE-së.
Sipas qytetarit, ndërprerja e energjisë ka nisur rreth orës 08:50 të mëngjesit dhe deri në orën 17:37, kur ai ka dërguar denoncimin, banorët vijonin të ishin pa furnizim me energji elektrike.
"Kemi që në orën 08:50 të mëngjesit pa drita. Morëm në telefon operatorët e OSHEE-së në Fier dhe i njoftuam për problemin. Na thanë se energjia do të vinte edhe një orë dhe na kërkuan të mos telefononim më.", shprehet ai.
Banori tregon se, pasi kaloi koha e premtuar dhe energjia nuk u rikthye, u përpoq të kontaktonte sërish operatorët e OSHEE-së, këtë herë edhe për të regjistruar bisedën, por askush nuk iu përgjigj.
"I morëm sërish në telefon që ta regjistronim bisedën dhe t'ua sillnim edhe juve si material, por nuk e hapën më telefonin nga asnjë numër.", thotë qytetari.
Sipas tij, kjo nuk është një situatë e izoluar, por një problem që përsëritet prej vitesh.
"Jemi e vetmja zonë e Fierit që kemi vazhdimisht probleme me energjinë elektrike. Dimër e verë ndodh e njëjta gjë. Këto problematika i kemi vazhdimisht.", shton ai.
Banori bën me dije se nuk ka arritur të regjistrojë bisedën me operatorët, por disponon historikun e telefonatave me oraret përkatëse, që sipas tij vërteton përpjekjet e bëra për të kontaktuar OSHEE-në.
JOQ Albania publikon këtë denoncim në interes të informimit publik dhe pret një reagim nga OSHEE lidhur me pretendimet e ngritura nga banorët e Fermë Çlirimit, si dhe një sqarim për arsyen e ndërprerjes së zgjatur të energjisë elektrike.
