Një incident është regjistruar mbrëmjen e sotme gjatë protestës së 35-të qytetare në Tiranë, teksa marshimi u ndal përpara Komisariatit nr. 3, ku protestuesit kërkuan lirimin e qytetarëve të arrestuar pak ditë më parë gjatë protestës para Kuvendit.
Në pamjet e mbërritura në redaksinë e JOQ Albania shihet se disa protestues godasin me mjete të forta derën hyrëse dhe dritaret e godinës së komisariatit, ndërsa në sfond dëgjohen thirrje si "Lironi çunat", në mbështetje të qytetarëve që vijojnë të mbahen të ndaluar.
Megjithatë, në të njëjtin moment, një pjesë e protestuesve dhe organizatorëve ndërhynë duke u bërë thirrje të pranishmëve të ndalonin veprimet ndaj godinës dhe të shmangnin çdo akt dhune. Sipas tyre, incidente të tilla nuk i shërbejnë kauzës së protestës dhe rrezikojnë të devijojnë vëmendjen nga kërkesat e qytetarëve.
Ndalesa përpara Komisariatit nr. 3 lidhet me arrestimet e kryera gjatë protestës së zhvilluar para Kuvendit disa ditë më parë, ku u regjistruan përplasje mes protestuesve dhe policisë, ndërsa disa qytetarë u shoqëruan dhe u arrestuan në mënyrë të dhunshme pas ndërhyrjes së forcave të rendit.
Protesta vijon në rrugët e kryeqytetit, ndërsa mbetet për t'u parë nëse Policia e Shtetit do të reagojë zyrtarisht lidhur me incidentin e shënuar pranë Komisariatit nr. 3.
