Ka hyrë në një tjetër fazë protesta e 35-të qytetare, teksa mijëra protestues që u mblodhën fillimisht në Sheshin "Skënderbej" kanë mbërritur tashmë përpara godinës së Kryeministrisë.
Nën thirrjet "Rama n'burg, Berisha n'burg", qytetarët kanë marshuar përgjatë bulevardit, ndërsa para Kryeministrisë kanë nisur fjalimet e protestuesve dhe aktivistëve, të cilët po përsërisin kërkesat për dorëheqjen e kryeministrit Edi Rama, largimin e klasës së vjetër politike dhe mbajtjen e zgjedhjeve të reja.
Ajo që ka tërhequr vëmendjen mbrëmjen e sotme është fakti se godina e Kryeministrisë është blinduar me dyer metalike në hyrje, një masë sigurie e marrë në një nga protestat që pritet të jetë ndër më masivet që nga nisja e lëvizjes qytetare.
Pamjet nga vendngjarja tregojnë se hyrja e institucionit është mbrojtur me barriera metalike, ndërsa forca të shumta policie janë vendosur në perimetrin e godinës.
Pas përfundimit të fjalimeve, protestuesit pritet të vijojnë marshimin në rrugët kryesore të kryeqytetit, në kuadër të protestës së 35-të kundër klasës politike.
