Autoritetet irakiane kanë arrestuar 47 politikanë, deputetë dhe zyrtarë të lartë në një operacion të gjerë kundër korrupsionit, i cili konsiderohet si një nga më të mëdhenjtë në historinë e vendit.
Bastisjet u zhvilluan në orët e para të mëngjesit në Bagdad, përfshirë edhe Zonën e Gjelbër, ku ndodhen institucionet kryesore shtetërore dhe ambasadat. Në operacion morën pjesë edhe forcat elitare të Shërbimit Kundër Terrorizmit të Irakut.
Sipas agjencisë shtetërore të lajmeve INA, mes të arrestuarve ndodhet edhe zëvendësministri i Naftës për Çështjet e Shpërndarjes, Ali Maarej, si dhe Muthanna al-Samarrai, lider i Aleancës Al-Azm. Gjithashtu, disa deputetëve iu hoq imuniteti parlamentar përpara arrestimit, me miratimin e kryetarit të Parlamentit.
Komisioni Federal i Integritetit njoftoi se operacioni po zbatohet në bazë të urdhrave gjyqësorë ndaj personave të dyshuar për përvetësim të fondeve publike, duke theksuar se të gjitha veprimet po kryhen në përputhje me ligjin.
Arrestimet thuhet se janë mbështetur edhe në dëshmitë e një ish-zëvendësministri të Naftës, i arrestuar muajin e kaluar për korrupsion.
Që prej marrjes së detyrës në muajin maj, kryeministri Ali al-Zaidi është zotuar të luftojë korrupsionin dhe keqmenaxhimin që kanë shoqëruar Irakun për dekada. Operacioni është përshëndetur nga figura të rëndësishme politike, të cilat e kanë cilësuar si një hap historik drejt vendosjes së drejtësisë dhe rikthimit të besimit të qytetarëve te institucionet.
