Është identifikuar viktima e aksidentit tragjik të ndodhur mesnatën e së shtunës në autostradën Lushnjë–Rrogozhinë.
Viktima është Taulant Veliu, 37 vjeç, banues në fshatin Grabjan, njësia administrative Grabjan, bashkia Divjakë. Sipas informacioneve paraprake, ai po lëvizte me biçikletë kur u përplas për vdekje nga një automjet tip “Benz” në afërsi të urës mbi lumin Shkumbin.
Policia e Lushnjës ka bërë me dije se drejtuesi i automjetit të parë, shtetasi B.M., 41 vjeç, është shoqëruar për veprime procedurale.
Sipas hetimeve paraprake, pas goditjes fillestare, 37-vjeçari është përplasur edhe nga një automjet i dytë, i drejtuar nga F.M., 39 vjeç, i cili po lëvizte pas mjetit të parë.
Ndërkohë, grupi hetimor po punon për zbardhjen e plotë të rrethanave të aksidentit.
