Irani ka njoftuar mbylljen e Ngushticës së Hormuzit për trafikun detar, duke e paraqitur këtë veprim si përgjigje ndaj asaj që e konsideron shkelje të marrëveshjeve të armëpushimit nga Shtetet e Bashkuara dhe Izraeli.
Sipas mediave shtetërore iraniane, vendimi është bërë publik nga Selia Qendrore Khatam al-Anbiya, komanda më e lartë e përbashkët ushtarake e vendit. Në deklaratën e saj thuhet se mbyllja e ngushticës përbën “hapin e parë” të reagimit iranian, ndërsa paralajmërohen masa të tjera nëse vazhdojnë ato që Teherani i konsideron veprime agresive nga SHBA-ja dhe Izraeli.
Ngushtica e Hormuzit konsiderohet një nga korridoret më të rëndësishme detare në botë. Përmes saj kalon një pjesë e konsiderueshme e eksporteve globale të naftës dhe gazit natyror, ndaj çdo kufizim i lëvizjes së anijeve mund të ketë ndikim të menjëhershëm në tregjet ndërkombëtare të energjisë dhe në ekonominë globale.
Njoftimi vjen në një moment tensioni të lartë në Lindjen e Mesme, pas akuzave të Iranit se armëpushimi i arritur së fundmi është shkelur. Autoritetet iraniane pretendojnë se veprimet ushtarake të Izraelit dhe qëndrimi i SHBA-së përbëjnë shkelje të angazhimeve të marra nga palët.
Megjithatë, deri në këto momente nuk ka konfirmime të pavarura se trafiku detar në Ngushticën e Hormuzit është ndërprerë plotësisht. Zyrtarë amerikanë kanë deklaruar se nuk kanë konstatuar lëvizje ushtarake që të tregojnë një bllokim efektiv të korridorit detar, ndërsa situata mbetet në zhvillim dhe po ndiqet nga afër nga komuniteti ndërkombëtar.
