Një qytetar ka denoncuar gjendjen problematike të papastërtisë në zonën turistike të Shtegut të Ujëvarës së Topojanit, në Bashkinë Kukës.
Sipas denoncimit, përgjatë shtegut dhe në afërsi të zonës turistike vërehen mbeturina të hedhura në vende të ndryshme, ndërsa koshat e mbeturinave janë të papastruar prej kohësh. Pamjet e dërguara nga qytetari tregojnë se mbetjet janë shpërndarë në disa pika të zonës, duke ndikuar negativisht në imazhin e një prej destinacioneve natyrore që frekuentohet nga vizitorë vendas dhe të huaj.
Qytetari i bën thirrje Bashkisë Kukës dhe institucioneve përgjegjëse të ndërhyjnë për pastrimin e zonës dhe mirëmbajtjen e rregullt të koshave, në mënyrë që të ruhet pastërtia dhe të promovohet siç duhet potenciali turistik i Ujëvarës së Topojanit.
Banorët dhe vizitorët kërkojnë më shumë kujdes për këtë aset natyror, duke theksuar se mbrojtja e mjedisit mbetet një nga kushtet kryesore për zhvillimin e turizmit në zonë.
