Një ngjarje që mund të kishte përfunduar në tragjedi u shmang falë reagimit të shpejtë të qytetarëve në Vlorë.
Sipas informacioneve të mbërritura në redaksinë e JOQ Albania, një parashutist humbi kontrollin gjatë fluturimit dhe përfundoi në det. Momenti ka shkaktuar shqetësim te personat që ndodheshin në zonë, të cilët kanë kuptuar menjëherë rrezikun dhe nuk kanë hezituar të ndërhyjnë.
Disa qytetarë janë futur në ujë për t'i ardhur në ndihmë parashutistit, duke bërë të mundur nxjerrjen e tij në kohë dhe shmangien e pasojave më të rënda. Falë reagimit të tyre të menjëhershëm dhe solidaritetit të treguar, parashutisti ka shpëtuar dhe mësohet se ndodhet në gjendje të mirë shëndetësore.
Ngjarja është një shembull i qartë se si ndërhyrja e shpejtë dhe guximi i qytetarëve mund të bëjnë diferencën në momente kritike, kur çdo sekondë ka rëndësi.
JOQ Albania falënderon qytetarët që u hodhën pa hezitim në ndihmë të parashutistit dhe treguan se humanizmi, solidariteti dhe guximi vazhdojnë të jenë vlera që nuk mungojnë mes shqiptarëve.
