Një zjarr me përmasa të mëdha ka përfshirë një biznes në ambientet e ish-Kombinatit Metalurgjik në Elbasan, duke shkaktuar një situatë alarmante dhe ndotje të konsiderueshme të ajrit në të gjithë zonën. Flakët janë përhapur me shpejtësi, ndërsa shtëllunga të dendura tymi janë ngritur në ajër dhe janë parë edhe nga distanca të largëta.
Intensiteti i zjarrit ka krijuar një panoramë shqetësuese, me flakë të fuqishme që kanë përfshirë objektin dhe rrezik për përhapje në zonat përreth. Zjarri ka shkaktuar ndotje të rëndë të ajrit, duke shtuar shqetësimin për banorët dhe aktivitetet në afërsi të zonës industriale.
Në vendngjarje kanë mbërritur forcat zjarrfikëse të Elbasanit, të cilat po punojnë për izolimin dhe shuarjen e flakëve, me qëllim parandalimin e përhapjes së mëtejshme. Deri tani nuk raportohen persona të lënduar dhe as shkaqet e rënies së zjarrit nuk janë bërë ende të ditura, ndërsa qytetarëve u rekomandohet të shmangin lëvizjet pranë zonës për shkak të tymit të dendur.
