Një mesazh i ndjerë ka mbërritur në redaksinë e JOQ Albania nga Landi, një 30-vjeçar nga Tirana me aftësi të kufizuara, i cili nuk kërkon ndihmë financiare, nuk kërkon lëmoshë dhe as mëshirë. Kërkesa e tij është shumë më e thjeshtë: një mundësi për të punuar dhe për të siguruar vetë të ardhurat e tij.
Landi tregon se ka eksperiencë pune me kompjuter, ka punuar si designer dhe ka njohuri në programin Excel. Gjithashtu, ai thotë se gjatë viteve ka kryer edhe punë të tjera që nuk kanë qenë të lidhura me punë krahu.
Megjithatë, pavarësisht përpjekjeve për të gjetur një vend pune, ai shprehet se është përballur me dyer të mbyllura. Sipas tij, ka shkuar disa herë në zyrat e punësimit, por gjithçka ka mbetur vetëm në premtime.
"Nuk dua të kërkoj as lëmoshë, as ndihmë materiale, por vetëm një punë që të jem i zoti i vetes", shkruan ai në mesazhin drejtuar redaksisë sonë.
Në një kohë kur shumë të rinj përballen me vështirësi për të gjetur punësim, historia e Landit merr një domethënie edhe më të veçantë. Ai nuk po kërkon favore, por një mundësi për të treguar aftësitë e tij dhe për të jetuar me dinjitet përmes punës së ndershme.
JOQ Albania publikon apelin e tij me shpresën se mes mijëra lexuesve tanë mund të ketë individë, kompani apo biznese që janë të gatshëm t'i japin një mundësi.
Nëse dikush mund ta ndihmojë Landin me një vend pune të përshtatshëm për aftësitë e tij, redaksia e JOQ Albania mbetet e gatshme të shërbejë si urë lidhëse.
Sepse ndonjëherë një mundësi e vetme mjafton për t'i ndryshuar jetën një njeriu.
