Një qytetar nga lagjja nr. 9 në Korçë, në rrugën “Midhi Kostani”, ka denoncuar pranë JOQ Albania kushtet e rrezikshme të punës në një kantier ndërtimi, ku sipas tij punëtorët punojnë me orare të gjata, edhe gjatë fundjavave, pa masat e nevojshme të sigurisë.
Banorët pretendojnë se punimet kryhen shpesh në lartësi pa pajisje mbrojtëse, duke vënë në rrezik jetën e punëtorëve. Ndërkohë, zhurmat e vazhdueshme nga kantieri po shqetësojnë prej kohësh komunitetin e zonës.
Sipas denoncimit, pavarësisht ankesave të bëra pranë institucioneve, nuk është marrë asnjë masë konkrete. Banorët kanë depozituar gjithashtu kallëzim në Prokurori për lejen e ndërtimit, duke ngritur dyshime për shkelje të distancave ligjore nga objektet ekzistuese.
Ata kërkojnë që Inspektorati i Punës, IKMT dhe organet e drejtësisë të kryejnë verifikime të menjëhershme për kushtet e punës dhe ligjshmërinë e ndërtimit.
