Kombëtarja e Anglisë është përballur me një incident të rëndë vetëm pak ditë para debutimit në Kupën e Botës, pasi një pjesë e pajisjeve të ekipit janë vjedhur gjatë transportit drejt bazës së saj stërvitore në Kansas City.
Sipas raportimeve, nga një furgon që transportonte pajisjet janë marrë këpucët e futbollit të disa prej lojtarëve kryesorë të ekipit, topat zyrtarë të turneut si dhe pajisje të tjera të rëndësishme stërvitore. Ngarkesa po udhëtonte nga West Palm Beach, Florida, drejt kompleksit stërvitor Swope Soccer Village në Missouri, ku Anglia do të qëndrojë për të paktën tre javët e ardhshme.
Stafi i ekipit po përpiqet të përcaktojë saktësisht se çfarë është vjedhur dhe çfarë ka mbetur në dispozicion për seancën e parë stërvitore. Mediat angleze bëjnë të ditur se mes pajisjeve të mbetura është gjetur vetëm një top futbolli, ndërsa ekziston frika se janë zhdukur edhe këpucët e yjeve si Harry Kane dhe Jude Bellingham.
Policia e Kansas City ka konfirmuar se po heton rastin. Në një deklaratë zyrtare thuhet se autoritetet po shqyrtojnë një vjedhje të mundshme nga një automjet i ekipit që mbërriti në qytet me pajisje të munguar. Hetimet vazhdojnë, ndërsa raportohet se tashmë është kryer një arrestim.
Ngjarja konsiderohet një goditje e rëndë për përgatitjet e Anglisë për ndeshjen hapëse të Kupës së Botës kundër Kroacisë. Dyshimet e para të stafit të sigurisë fokusohen edhe te persona të përfshirë në transportin e pajisjeve, ndërsa Federata Angleze e Futbollit po bashkëpunon ngushtë me policinë lokale për rikuperimin e sendeve të vjedhura.
Mes pajisjeve të zhdukura raportohet se ndodhen edhe mjete analitike, tabelat taktike të trajnerit Thomas Tuchel dhe tavolina masazhi, elemente të rëndësishme për përgatitjen e ekipit. Tashmë stafi anglez përballet me një garë kundër kohës për të zëvendësuar ose rikuperuar materialet e humbura përpara nisjes së turneut.
