Një aksident rrugor është regjistruar pranë zonës së Liqenit të Thatë në Tiranë, ku një autobus i linjës së Kopshtit Zoologjik është përplasur me një automjet që, sipas dëshmitarëve, i ka prerë rrugën gjatë një manovre parakalimi.
Sipas informacioneve paraprake, drejtuesja e automjetit ka hyrë në parakalim, ndërsa autobusi nuk ka arritur të shmangë përplasjen. Shoferi i autobusit ka frenuar fort në përpjekje për të ndaluar mjetin, çka ka bërë që pasagjerët të rrëzohen brenda autobusit.
Si pasojë e frenimit të menjëhershëm dhe incidentit, dy vajza që ndodheshin në autobus kanë humbur ndjenjat përkohësisht. Dëshmitarët raportojnë se pothuajse të gjithë pasagjerët janë rrëzuar në dysheme nga goditja dhe frenimi i fortë.
Rrethanat e plota të aksidentit pritet të sqarohen nga autoritetet, ndërsa nuk ka ende informacion zyrtar për persona të plagosur rëndë.
