Policia Rrugore po orienton gjithnjë e më shumë kontrollin e trafikut drejt teknologjisë, duke reduktuar gradualisht praninë e patrullave tradicionale në akset kombëtare. Radarët e shpejtësisë, kamerat inteligjente dhe dronët po përdoren tashmë si mjetet kryesore për monitorimin e qarkullimit dhe evidentimin e shkeljeve.
Sipas autoriteteve, kjo qasje synon të garantojë një mbikëqyrje më të gjerë dhe më efikase të rrjetit rrugor, duke mundësuar identifikimin në kohë reale të shkelësve.
Megjithatë, ndërsa teknologjia po fiton terren, në disa segmente rrugore vihet re mungesa e patrullave fizike, të cilat për vite me radhë kanë shërbyer edhe si faktor parandalues për drejtuesit e mjeteve.
Një shembull konkret vjen nga aksi i Milotit, ku janë konstatuar raste të përsëritura parakalimesh në segment me vijë të dyfishtë të pandërprerë. Bëhet fjalë për një nga shkeljet më të rrezikshme, pasi zona karakterizohet nga dukshmëri e kufizuar dhe qarkullim i dendur automjetesh.
Sipas specialistëve, këto manovra lidhen jo vetëm me mungesën e përgjegjshmërisë së drejtuesve, por edhe me perceptimin se kontrolli në terren është më pak i pranishëm. Ndërkohë, vijat e dyfishta në këtë segment janë vendosur pikërisht për të shmangur përplasjet frontale dhe aksidentet me pasoja të rënda.
