Një qytetar nga Pogradeci ka ngritur shqetësimin për gjendjen e tualeteve publike pranë tregut të qytetit, duke denoncuar mungesën e pastrimit dhe mirëmbajtjes së tyre.
Sipas tij, ambientet nuk pastrohen prej kohësh dhe era e rëndë që përhapet në zonë është kthyer në një problem serioz për tregtarët, banorët dhe qytetarët që frekuentojnë tregun.
“Është e pamundur të kalosh pranë tyre pa maskë. Era është shumë e rëndë dhe situata po bëhet çdo ditë e më e vështirë. Njerëzit po shmangin zonën për shkak të kushteve që janë krijuar”, shprehet qytetari në ankesën e tij.
Sipas denoncimit, mungesa e higjienës jo vetëm që krijon shqetësim për kalimtarët, por ndikon edhe në aktivitetin e tregut, pasi shumë qytetarë hezitojnë ta frekuentojnë atë. Banorët e zonës thonë se problematika është e vazhdueshme dhe kërkojnë ndërhyrje të menjëhershme nga institucionet përgjegjëse.
Qytetari apelon që strukturat përgjegjëse të marrin masa për pastrimin dhe dezinfektimin e tualeteve publike, si dhe të sigurojnë mirëmbajtje të rregullt, në mënyrë që të shmangen problemet higjieno-sanitare dhe të përmirësohen kushtet për komunitetin.
Banorët presin reagim dhe zgjidhje konkrete, duke theksuar se situata aktuale është e papranueshme për një zonë të frekuentuar çdo ditë nga qindra qytetarë.
