Policia e Tiranës ka dalë me një apel urgjent për qytetarët pas vrasjes së 27-vjeçarit Ardian Balloshi në Kamëz, ndërsa vijojnë kërkimet për kapjen e autorit të dyshuar, Sadik Llani.
Sipas njoftimit zyrtar, i dyshuari konsiderohet person me rrezikshmëri të lartë shoqërore dhe dyshohet se është ende i armatosur. Për këtë arsye, autoritetet u kanë kërkuar banorëve të Kamzës dhe zonave përreth të tregojnë kujdes të shtuar dhe të shmangin çdo kontakt apo përballje me të.
Në operacionin për lokalizimin dhe arrestimin e tij janë angazhuar forcat speciale RENEA, strukturat operacionale të Policisë së Shtetit dhe efektivë të Drejtorisë Vendore të Policisë Tiranë, të cilët po zhvillojnë kontrolle intensive në terren.
Autoritetet u bëjnë thirrje qytetarëve që, në rast se shohin Sadik Llanin ose kanë informacion mbi vendndodhjen e tij, të mos ndërmarrin asnjë veprim vetë, por të kontaktojnë menjëherë Policinë në numrin 112 ose në numrin e posaçëm 069 41 05 735.
Për të nxitur bashkëpunimin e qytetarëve, Policia e Tiranës ka vendosur një shpërblim prej 10 mijë eurosh për çdo informacion të saktë që do të çojë në lokalizimin dhe kapjen e të dyshuarit.
Policia garanton se çdo informacion i dhënë do të trajtohet me konfidencialitet të plotë, ndërsa kërkimet për kapjen e autorit të dyshuar vijojnë në disa zona të kryeqytetit dhe periferisë së tij.
