I riu që shihni në foto është 27-vjeçari Ardian Baloshi, i cili humbi jetën këtë të hënë në Kamëz pasi u qëllua me armë zjarri. Pavarësisht përpjekjeve për t’i dhënë ndihmën e nevojshme mjekësore, ai nuk mundi t’u mbijetojë plagëve të marra dhe ndërroi jetë gjatë transportimit drejt spitalit.
Ngjarja e rëndë ndodhi rreth orës 11:25, në rrugën “Dervish Luzha” në Kamëz. Sipas të dhënave paraprake, Baloshi dyshohet se është qëlluar pas një konflikti për motive të dobëta.
Policia ka identifikuar si autor të dyshuar 39-vjeçarin Sadik Llanaj, i cili pas ngjarjes është larguar me automjetin e tij dhe vijon të jetë në arrati. Për kapjen e tij janë angazhuar forca të shumta policore, përfshirë edhe efektivë të RENEA-s, ndërsa janë ngritur pika kontrolli në akset kryesore rrugore.
Nën drejtimin e Prokurorisë, grupi hetimor po punon për zbardhjen e plotë të rrethanave të ngjarjes, dokumentimin e saj ligjor dhe vënien e autorit të dyshuar përpara drejtësisë.
Policia ka sqaruar gjithashtu se nga kjo ngjarje nuk ka persona të tjerë të lënduar.
