Mesfushori i Kombëtares shqiptare, Ylber Ramadani, ka marrë një tjetër vlerësim nga Italia pas paraqitjeve të tij në Serie A.
Gazetari i njohur i DAZN, Tommaso Turci, e ka përzgjedhur Ramadanin në mesin e katër futbollistëve që e kanë impresionuar më shumë nga afër gjatë sezonit, duke zgjedhur nga një lojtar për çdo repart të fushës.
Në një episod të podcastit të tij, Turci shpjegoi se nuk kishte zgjedhur emrat më të famshëm të kampionatit, por futbollistë që shpesh qëndrojnë larg vëmendjes së madhe mediatike, edhe pse kanë pasur një rol vendimtar për skuadrat e tyre. Përkrah Ramadanit, ai përmendi portierin Wladimiro Falcone, mbrojtësin Ramon dhe sulmuesin Nikola Krstovic.
Sipas vlerësimeve të gazetarit italian dhe specialistëve të Serie A, Ramadani është një nga ata lojtarë që ndikojnë fuqishëm në lojë edhe pse kontributi i tyre nuk reflektohet gjithmonë në statistikat e golave apo asistimeve. Mesfushori kuqezi është vlerësuar për aftësinë në rikuperimin e topit, mbulimin e hapësirave, disiplinën taktike dhe ekuilibrin që i jep skuadrës në mesfushë.
Një tjetër element që e ka bërë Ramadanin të spikasë është puna e tij "e padukshme", ajo pjesë e lojës që shpesh nuk bie në sy për tifozët, por që konsiderohet thelbësore nga trajnerët dhe analistët. Ai shquhet për agresivitetin pozitiv në duele, sakrificën për ekipin dhe aftësinë për të prishur aksionet e kundërshtarëve para se ato të bëhen të rrezikshme.
Këto cilësi e kanë kthyer shqiptarin në një nga pikat më të rëndësishme të mesfushës së Lecce-s dhe një nga futbollistët që ka fituar respektin e gazetarëve dhe specialistëve të kampionatit italian.
Përzgjedhja e tij nga Tommaso Turci përkrah emrave të tjerë të spikatur të Serie A përbën një tjetër dëshmi të reputacionit që Ramadani ka ndërtuar në Itali, ku vazhdon të konsiderohet një nga lojtarët më të besueshëm dhe më të dobishëm në rolin e tij.
