Dy vëllezër nga Laçi kanë përfunduar në spital në orët e para të mëngjesit të së premtes, pasi dyshohet se janë dhunuar nga persona ende të paidentifikuar në Tiranë. Sipas Policisë, rreth orës 03:00 për ndihmë mjekësore janë paraqitur Klisman Rrapushi (Lepuri), i plagosur në këmbë dyshohet me armë zjarri, dhe vëllai i tij, Klaudio Gega (Lepuri), i cili ka pësuar dëmtime në këmbë.
Të dy kanë deklaruar para autoriteteve se janë sulmuar nga disa persona të panjohur në ambientet e jashtme të një subjekti në rrugën “Faik Konica” në kryeqytet. Fatmirësisht, sipas mjekëve, të plagosurit ndodhen jashtë rrezikut për jetën dhe po marrin trajtimin e nevojshëm mjekësor.
Pas ngjarjes, policia ka nisur hetimet për zbardhjen e plotë të rrethanave të incidentit. Grupi hetimor, nën drejtimin e Prokurorisë, po punon për identifikimin dhe kapjen e autorëve, si dhe për dokumentimin e plotë të ngjarjes.
