Kryeministri Edi Rama publikoi ditën e sotme një mesazh të ashtuquajturit “qytetar dixhital”, ku denoncohej hedhja e mbeturinave pa kriter në zonën e mbrojtur të Zvërnecit. Në mesazhin e publikuar, përgjegjësia për situatën e krijuar i atribuohej personave që kanë protestuar kundër projektit të parashikuar në këtë zonë.
Postimi i kreut të qeverisë ka shkaktuar reagime të shumta në rrjetet sociale, ku shumë komentues kanë kundërshtuar pretendimet e paraqitura në denoncim. Sipas tyre, përgjegjësia për ndotjen dhe menaxhimin e mbetjeve i takon institucioneve vendore dhe qendrore, duke përfshirë Bashkinë e Vlorës dhe qeverinë.
Në dhjetëra komente, ndjekësit e Ramës e kanë cilësuar publikimin si një përpjekje për të devijuar vëmendjen nga shqetësimet e ngritura nga qytetarët, të cilët një ditë më parë protestuan duke kërkuar anulimin e projektit në Zvërnec dhe dorëheqjen e kryeministrit. Në reagimet e tyre kanë mbizotëruar ironitë, kritikat dhe akuzat ndaj pushtetit vendor për gjendjen e krijuar në zonë.
