Pamjet e publikuara nga mediat greke kanë fiksuar momentin kur 48-vjeçari shqiptar Edmond Tafa arratiset nga burgu i sigurisë së lartë në Koridhalos, ndërsa dy punonjës të institucionit përpiqen ta ndjekin pa sukses.
Ngjarja ndodhi në orët e mëngjesit të djeshëm gjatë procesit të shpërndarjes së ushqimit në burg. Sipas informacioneve të autoriteteve greke, Tafa ishte i angazhuar në Depon Qendrore të Furnizimeve dhe merrej me transportimin e bukës, një rrethanë që dyshohet se i krijoi mundësinë për t’u larguar nga ambientet e institucionit.
48-vjeçari po vuante një dënim për vepra penale që lidhen me trafikun e narkotikëve. Mediat greke raportojnë se ai kishte përfituar më herët disa leje të rregullta dhe ishte kthyer çdo herë në kohën e përcaktuar nga autoritetet, pa shkelur kushtet e vendosura.
Pas arratisjes, autoritetet greke arrestuan dy punonjës të burgut, të cilët po hetohen për përgjegjësinë e tyre të mundshme në ngjarje. Ata u ndaluan nga Njësia e Hetimit dhe Zbardhjes së Krimeve në Pire, ndërsa ndaj tyre ka nisur edhe procedura disiplinore e parashikuar nga ligji.
Ndërkohë, policia greke vijon kërkimet për kapjen e Edmond Tafës, i cili mbetet ende në arrati.
