Një aksident i rëndë automobilistik ka ndodhur në orët e para të mëngjesit në Lushnje, ku ka humbur jetën 43-vjeçari Ernis Xhumari. Ngjarja ka ndodhur pranë rrethrrotullimit të njohur si “Plastmasi”, ku automjeti tip “Benz” që ai drejtonte ka dalë nga kontrolli teksa lëvizte me shpejtësi të lartë.
Sipas të dhënave paraprake, mjeti ka goditur fillimisht bordurën e rrethrrotullimit dhe më pas është përplasur me një shtyllë ndriçimi. Përplasja ka qenë tepër e fortë, duke bërë që automjeti të përfundojë dhjetëra metra larg vendit të goditjes. Si pasojë e plagëve të marra, 43-vjeçari ka ndërruar jetë në vendngjarje.
Në vendin e aksidentit kanë mbërritur menjëherë shërbimet e policisë dhe zjarrfikësit, të cilët kanë kryer pastrimin e rrugës nga mbetjet e automjetit. Ndërkohë, policia ka nisur hetimet dhe po kryen veprimet procedurale për të zbardhur plotësisht shkaqet dhe rrethanat e këtij aksidenti tragjik.
