Një qytetar nga lagjja Gërmadh, në Njësinë Administrative Dajt, ka ngritur shqetësimin për mungesën e rrjetit të ujësjellësit në zonë, pavarësisht afërsisë me qytetin e Tiranës.
Banorët thonë se detyrohen të sigurojnë ujin për nevojat e përditshme duke mbledhur ujë shiu në bidona dhe fuçi sa herë që ka reshje.
"Është turp që në vitin 2026 të vuajmë për një pikë ujë. Jemi vetëm 5 kilometra larg Bashkisë së Tiranës, por ende nuk kemi rrjet uji. Mbushim bidonat dhe fuçitë me ujë shiu sa herë bie shi", shprehet qytetari.
Banorët kërkojnë ndërhyrjen e institucioneve përgjegjëse për zgjidhjen e këtij problemi, duke theksuar se mungesa e furnizimit me ujë të pijshëm po ua vështirëson ndjeshëm jetën e përditshme.
Situata bëhet edhe më shqetësuese me afrimin e sezonit të verës dhe rritjen e temperaturave, kur nevoja për ujë është edhe më e madhe. Banorët shprehen se pa një zgjidhje të shpejtë, mungesa e ujit rrezikon të kthehet në një problem serioz për shëndetin dhe jetesën e komunitetit, duke i lënë familjet përballë vështirësive edhe më të mëdha gjatë muajve të nxehtë.
