Ministrja e Shëndetësisë, Evis Sala ka shkarkuar Anxhela Paparizon nga drejtimi i Qendrës Spitalore Nënë Tereza (QSUT). Në vendin e Paparizos është emëruar si drejtuese e re e QSUT-së, Rudina Degjoni. Sipas njoftimit të ministrisë së Shëndetësisë, Degjoni vjen nga një eksperiencë e gjatë në menaxhimin spitalor.
Paparizo u vendos në krye të institucionit më të madh shëndetësor në vend pas largimit të Florenc Spahos. Paparizo ka një formim në Histori dhe Gazetari, ndërsa karriera e saj është ndarë mes Tiranës dhe Kanadasë. Përpara se të largohej në vitin 2008, ajo ka mbajtur disa poste drejtuese në Bashkinë e Tiranës. Prej vitesh jeton në Ontario, ku drejton Departamentin e Arteve dhe Kulturës në Bashkinë e qytetit Burlington.
Në 2024, Paparizo ishte e pranishme në një takim në selinë e Partisë Demokratike me ish-kryeministrin Sali Berisha, si nënkryetare e Këshillit Koordinues të Diasporës. Në atë kohë, Berisha e quajti takimin një shkëmbim idesh për situatën në Shqipëri dhe për të drejtën e votës së emigrantëve.
