Toka pritet të përfshihet nga një periudhë prej rreth pesë vitesh me temperatura të larta ekstreme, të ndikuara nga fenomeni El Niño. Sipas një raporti të Organizatës Botërore Meteorologjike World Meteorological Organization, gjatë periudhës 2026–2030 temperaturat mesatare globale mund të jenë deri në 1.9°C më të larta krahasuar me mesataren e një shekulli më parë.
Raporti paralajmëron gjithashtu se viti 2027 mund të thyejë rekordin e vitit 2024 si më i nxehti i regjistruar ndonjëherë, si pasojë e intensifikimit të El Niño-s drejt fundit të këtij viti.
Këto përfundime bazohen në analizat e 13 institucioneve kërkimore ndërkombëtare, të cilat kanë dhënë parashikime në shkallë globale.
El Niño është faza e ngrohtë e ciklit klimatik natyror ENSO, e karakterizuar nga ngrohja e pazakontë e ujërave sipërfaqësore në pjesën qendrore dhe lindore të Oqeanit Paqësor.
Ky fenomen shkakton ndryshime të mëdha në sistemin klimatik të planetit. Zhvendosja e masave të ujit të ngrohtë drejt zonave si Australia dhe Indonezia, dhe më pas drejt Amerikës së Jugut, sjell thatësira të theksuara në disa rajone dhe reshje të dendura e përmbytje në të tjera.
Në Amerikën e Veriut shpesh shfaqen dimra më të butë dhe më të thatë, ndërsa në Euroazi dimrat priren të jenë më të ngrohtë dhe me më shumë reshje.
Ky cikël zakonisht zgjat rreth 9 deri në 12 muaj dhe më pas pasohet nga faza e kundërt, e njohur si La Niña, e cila karakterizohet nga ftohja e ujërave oqeanike.
