Drejtori i Përgjithshëm i Policisë së Shtetit, Skënder Hita, ka bërë një deklaratë të fortë lidhur me ngjarjen e ndodhur në Zvërnec, duke pranuar publikisht se efektivët e policisë që ndodheshin në vendngjarje nuk reaguan siç duhej.
Në një konferencë për mediat, Hita nuk i kurseu kritikat ndaj Policisë së Vlorës, duke theksuar se uniformat blu u treguan të papërgatitura dhe jo profesionale në momentin kur një qytetar u dhunua nga punonjës të sigurisë private.
“Policia u shfaq e fjetur dhe jo profesionale”, deklaroi drejtori i Policisë së Shtetit, një pranim i rrallë që nxjerr në pah dështimin e strukturave lokale për të garantuar rendin dhe për të mbrojtur qytetarët.
Deklarata e Hitës vjen pas reagimeve të shumta publike dhe publikimit të pamjeve që ngritën pikëpyetje të forta mbi rolin e policisë gjatë incidentit. Qytetarët kanë kërkuar shpjegime se përse efektivët e pranishëm nuk ndërhynë në kohë për të ndalur dhunën dhe për të vendosur kontrollin e situatës.
Sipas kreut të Policisë së Shtetit, institucioni që ai drejton ka ndërmarrë masa për të analizuar veprimet e efektivëve të përfshirë dhe për të garantuar respektimin e standardeve profesionale në raste të ngjashme.
Ngjarja e Zvërnecit ka rikthyer debatin mbi reagimin e forcave të rendit në situata kritike, ndërsa deklarata e drejtorit Hita shihet si një pranim i qartë se policia dështoi të kryente detyrën e saj në një moment kur pritej të ishte garantja e sigurisë dhe ligjit.
