Një aksident i rëndë rrugor është shënuar mesditën e kësaj të mërkure në bypass-in e Fierit, pranë fshatit Mbrostar, ku dy automjete që po lëviznin në të njëjtin drejtim janë përplasur me njëri-tjetrin.
Si pasojë e përplasjes së fortë, katër persona kanë mbetur të lënduar, mes tyre edhe dy turistë të huaj. Të plagosurit janë transportuar menjëherë drejt Spitalit Rajonal të Fierit për të marrë ndihmën e nevojshme mjekësore.
Sipas informacioneve paraprake, gjendja e tyre shëndetësore paraqitet e stabilizuar dhe fatmirësisht ndodhen jashtë rrezikut për jetën.
Pas marrjes së njoftimit, në vendngjarje kanë mbërritur shërbimet e Policisë Rrugore, të cilat kanë nisur veprimet hetimore për të zbardhur rrethanat e aksidentit.
