Forcat Operacionale dhe ato Speciale të Drejtorisë së Përgjithshme të Burgjeve kanë zhvilluar mbrëmjen e kaluar një aksion kontrolli të detajuar në IEVP Fushë-Krujë, si pjesë e masave të përforcuara për garantimin e sigurisë dhe parandalimin e futjes së sendeve të ndaluara në institucion.
Operacioni është realizuar me urdhër të Drejtorit të Përgjithshëm të Burgjeve, Adriatik Kupi, ndërsa procesi i kontrolleve është koordinuar nga Drejtori i Policisë së Burgjeve, Drejtuesi i Lartë Paulin Rajta.
Verifikimet janë shtrirë si në ambientet e brendshme, ashtu edhe në ato të jashtme të burgut, duke përfshirë sektorin e observimit, regjimin e brendshëm dhe zonën e njohur si brezi i butë i sigurisë.
Gjatë kontrolleve, në hapësirën mes Godinës A dhe ambienteve të observimit, efektivët kanë zbuluar të fshehura brenda një çorapeje një telefon celular të markës “Samsung”, një kabllo karikimi dhe një palë kufje.
Sipas njoftimit zyrtar, sendet e sekuestruara janë referuar për vijimin e procedurave hetimore dhe veprimeve të mëtejshme ligjore, ndërsa për ngjarjen është vënë në dijeni edhe Agjencia e Mbikëqyrjes së Sistemit të Ekzekutimit të Vendimeve Penale.
