Në burgun e Fierit është zhvilluar një kontroll i befasishëm nga forcat operacionale të Drejtorisë së Përgjithshme të Burgjeve, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale. Gjatë kontrollit në ambientet pranë Godinës “A”, janë konstatuar dhe sekuestruar 10 telefona celularë, 10 karikues, disa bidona me përmbajtje të dyshuar alkoolike, si dhe lëndë narkotike e dyshuar e ndarë në disa vende.
Sipas njoftimit zyrtar, kontrollet janë zhvilluar në kuadër të masave për forcimin e sigurisë dhe parandalimin e futjes së sendeve të ndaluara në institucion. Në një nga rastet, gjatë kontrollit me skaner ndaj të dënuarit A.M., janë gjetur pesë qese të vogla me lëndë të dyshuar narkotike të fshehura në veshje, duke çuar në ndërhyrjen e menjëhershme të stafit të burgut.
Autoritetet kanë hartuar raportet përkatëse dhe kanë njoftuar institucionet përgjegjëse për vijimin e procedurave hetimore dhe administrative. Ndërkohë, i dënuari A.M. është shoqëruar në izolim, ndërsa pritet verifikimi i plotë i origjinës së sendeve të sekuestruara dhe mënyrës së futjes së tyre në ambientet e burgut.
