Procesi i votimit për zgjedhjen e kryetarit të Partisë Demokratike ka vijuar gjatë gjithë ditës, ndërsa kandidati i vetëm në garë është Sali Berisha. Demokratët iu drejtuan qendrave të votimit në disa degë të vendit, në një proces që vetë Berisha e ka cilësuar si një “referendum” për drejtimin e partisë.
Gjatë votimeve, vëmendje tërhoqi deklarata emocionale e një qytetareje të moshuar në Korçë, e cila tha se vuan nga kanceri në zorrën e trashë, mushkëri dhe mëlçi, por kishte zgjedhur të merrte pjesë në votim. Ajo foli për vështirësitë ekonomike dhe sociale në vend, duke shprehur shqetësim për të rinjtë dhe gjendjen e familjeve shqiptare.
Mes lotësh dhe emocionesh, e moshuara u bëri thirrje qytetarëve që të dalin në votime dhe të mbështesin Berishën, të cilin e cilësoi si “idhull”. Ajo tregoi se ka qenë pjesë e strukturave demokratike që prej viteve ’90 dhe se, pavarësisht gjendjes së rënduar shëndetësore, kishte vendosur të ishte e pranishme në këtë proces politik.
