Gjermania publikon listën: Rikthehet veterani i portës, Manuel Neuer

Pas një mungese të gjatë nga kombëtarja, Manuel Neuer duket se është gati të rikthehet mes shtyllave të Gjermanisë për aventurën në Kupën e Botës 2026, që do të zhvillohet në Amerikë, Kanada dhe Meksikë.

Konfirmimi ka ardhur nga trajneri i përfaqësueses gjermane, Julian Nagelsmann, i cili ka bërë të ditur se portieri dhe kapiteni i Bayern Munich do të jetë sërish pjesë e planeve të ekipit për turneun madhor që do të organizohet në SHBA, Kanada dhe Meksikë.

Neuer i kishte dhënë lamtumirën kombëtares në fund të verës së vitit 2024, duke shpjeguar se synonte të fokusohej tërësisht te angazhimet dhe objektivat me Bayern Munich. Vendimi i tij u konsiderua si mbyllja e një kapitulli të rëndësishëm për Gjermaninë, pasi për më shumë se një dekadë ai ishte një nga liderët dhe figurat më të spikatura të skuadrës.

Ndeshja e fundit e portierit legjendar me fanellën e Gjermanisë ishte humbja ndaj Spanjës në çerekfinalet e UEFA Euro 2024, një sfidë që tashmë daton rreth 700 ditë më parë.

Kthimi i Neuer konsiderohet një shtysë e rëndësishme për ekipin e Julian Nagelsmann, me Gjermaninë që synon të rikthehet mes skuadrave pretendente në arenën botërore dhe të luajë një rol protagonist në Botërorin e vitit 2026.