Një pretendim që po qarkullon gjerësisht në rrjetet sociale i atribuohet Psychology Today, ku thuhet se “80% e grave kanë instinkte hetuese më të mprehta se edhe agjentët e FBI-së”, sidomos në situata që lidhen me marrëdhëniet personale.
Sipas këtij narrative virale, thuhet se intuita femërore, e kombinuar me vëzhgimin e detajuar dhe ndjeshmërinë emocionale, krijon një aftësi të fortë për të dalluar ndryshime të vogla në sjellje, mospërputhje apo sinjale që të tjerët mund t’i anashkalojnë. Këto aftësi përshkruhen si një formë “detektimi social”, ku truri përpunon në mënyrë të shpejtë modele sjelljeje dhe emocionale.
Psikologjia moderne flet më gjerë për intuitën si një proces njohës që bazohet në përvojë, kujtesë dhe përpunim të shpejtë të informacionit.
Studime të ndryshme sugjerojnë se njerëzit në përgjithësi, pa dallim gjinie mund të zhvillojnë aftësi të forta për të lexuar situata sociale, sidomos kur kanë përvojë në marrëdhënie dhe ndërveprime njerëzore. Dallimet individuale shpesh lidhen më shumë me përvojën personale sesa me gjininë si faktor i vetëm.
Në këtë kuptim, “intuita” nuk konsiderohet një superfuqi e lindur, por një kombinim i vëzhgimit, përvojës dhe analizës së pavetëdijshme që truri e kryen në sekonda.
