Një prift katolik dhe ekzorcist ka bërë deklarata të forta lidhur me fenomenin e UFO-ve, duke pretenduar se ato mund të jenë manipulime të djallit për të krijuar dyshime mbi besimin fetar.
At Carlos Martins rrëfeu për “Mail Online” historinë e një miku të tij, i cili sipas tij kishte parë një objekt gjigant fluturues mbi një park në qytetin ku jetonin.
Sipas dëshmisë, objekti ishte aq i madh sa “shtrihej sa disa fusha futbolli” dhe qëndroi pezull në qiell për pak çaste, përpara se të zhdukej me një shpejtësi të jashtëzakonshme.
“Miku im po ecte me një person tjetër pranë një parku kur panë një anije gjigante në qiell. Ishte jashtëzakonisht e madhe”, tregoi prifti.
Ai shton se nuk pati raportime të tjera për këtë ngjarje dhe askush tjetër në zonë nuk deklaroi se kishte parë UFO-n.
Megjithatë, sipas Martins, miku i tij arriti në përfundimin se ajo që kishin parë mund të mos kishte qenë një anije aliene, por një iluzion i krijuar nga djalli.
Ekzorcisti pretendon se ideja e jetës jashtëtokësore mund të përdoret për të krijuar dyshime mbi shkrimet fetare dhe për të sfiduar besimin tek Zoti.
“Nëse djalli arrin t’i bindë njerëzit se ekzistojnë qytetërime të tjera jashtëtokësore, ai krijon një version konkurrues me shkrimet e shenjta”, deklaroi ai.
Sipas priftit, objekti u zhduk “brenda një sekonde”, duke u larguar me një shpejtësi që ai e përshkroi si “e pabesueshme, si plumb”.
At Martins shtoi gjithashtu se gjatë dekadës së fundit janë shtuar rastet ku raportimet për UFO shfaqen paralelisht me raste ekzorcizmash, edhe pse ai thekson se këto mbeten pretendime dhe jo prova të verifikuara shkencërisht.
