Detaje të reja kanë dalë nga plagosja e efektivit të policisë mbrëmjen e sotme në dalje të fshatit Kutalli.
Sipas burimeve, 45-vjeçari Zamir Skënderi, me precedentë penalë, ishte shoqëruar më herët gjatë ditës pasi ishte konfliktuar në ambientet e Prokurorisë së Fierit. Pas shoqërimit nga DVP Fier, ai iu dorëzua Policisë së Kuçovës për transport drejt komisariatit.
Gjatë rrugës, në momentin kur ndodhej në sediljen e pasme të automjetit të policisë, Skënderi ka arritur të marrë armën e shërbimit të efektivit 20-vjeçar Arsen Toska dhe ka qëlluar ndaj tij, duke e plagosur në kofshë.
Menjëherë pas të shtënës, situata është përshkallëzuar brenda mjetit. Dy efektivët e tjerë kanë reaguar duke ndërhyrë dhe kanë arritur ta neutralizojnë dhe arrestojnë 45-vjeçarin.
Efektivi i plagosur është transportuar fillimisht në Spitalin Rajonal të Beratit, ku ka marrë ndihmën e parë, ndërsa më pas është dërguar drejt Spitalit të Traumës në Tiranë për trajtim më të specializuar.
Në vendngjarje kanë shkuar forca të shumta policie dhe ekspertë të AMP-së, të cilët po kryejnë hetimet për të zbardhur plotësisht dinamikën e ngjarjes dhe mënyrën se si i shoqëruari ka arritur të çarmatosë efektivin.
