Një situatë e pazakontë është raportuar në zonën e Plazhit të Vjetër në Vlorë, ku një automjet prej dy ditësh qëndron i braktisur pranë vijës bregdetare, ndërsa rrezikon të përfundojë i mbuluar nga rëra dhe uji i detit.
Ka qenë një qytetar që i është drejtuar redaksisë së JOQ Albania duke dërguar një video nga vendi i ngjarjes, ku shihet mjeti i lënë në bregdet, në një pozicion që sipas tij po bëhet çdo orë e më problematik.
“Kjo makina ka dy ditë këtu, po e thith rëra, është në ujë”, shkruan qytetari, i cili shpreh shqetësimin se automjeti mund të fundoset plotësisht nëse nuk ndërhyhet në kohë.
Sipas denoncimit, makina ndodhet në zonën e Plazhit të Vjetër dhe deri më tani nuk ka pasur asnjë lëvizje për ta larguar nga aty. Ende nuk dihet se kujt i përket mjeti dhe përse është braktisur në bregdet.
Qytetari u bën thirrje pronarëve të mjetit ose autoriteteve përkatëse të marrin masa sa më shpejt, përpara se automjeti të përfundojë nën rërë dhe të dëmtohet plotësisht nga uji i detit.
