Organizata Botërore e Shëndetësisë ka shpallur një emergjencë shëndetësore publike me shqetësim ndërkombëtar për Republikën Demokratike të Kongos dhe Ugandën për shkak të epidemisë së Ebolës që po përfshin këto vende. Megjithatë, sqarohet se kriteret për përcaktimin e një pandemie nuk përmbushen.
Ky zhvillim vjen pasi Uganda të premten konfirmoi përhapjen e virusit ngjitës në vend, duke pretenduar se epidemia ishte “importuar” nga Republika Demokratike e Kongos. Një pacient vdiq në një njësi të kujdesit intensiv (ICU) më 14 maj pasi zhvilloi simptoma të etheve hemorragjike.
Qindra raste të dyshuara
Kongo ka regjistruar 336 raste të dyshuara dhe 88 vdekje. Qendrat Afrikane për Kontrollin dhe Parandalimin e Sëmundjeve kanë thirrur një takim urgjent me autoritetet kongoleze, Ugandën, Sudanin e Jugut dhe partnerët ndërkombëtarë për të intensifikuar mbikëqyrjen ndërkufitare dhe për të forcuar përpjekjet e reagimit.
Ebola mbetet shpesh fatale, pavarësisht trajtimeve dhe vaksinave të zhvilluara së fundmi. Që nga viti 1976, kur u identifikuan rastet e para në atë që atëherë ishte Zaire, tani Republika Demokratike e Kongos, ajo ka vrarë të paktën 15,000 njerëz në Afrikë. Virusi transmetohet nëpërmjet lëngjeve trupore dhe simptomat kryesore të sëmundjes janë ethet, gjakderdhja dhe diarreja.
