Miliarderi Elon Musk ka ndezur sërish debate në rrjetet sociale pas disa komenteve të bëra në platformën e tij X (ish-Twitter), ku këtë herë ka folur për Instagramin dhe mënyrën se si përdoret nga meshkujt.
Gjatë një diskutimi viral mbi sjelljet e përdoruesve në internet, kreu i “Tesla-s” dhe “X” shkroi shkurt: “Instagram is for girls” (“Instagrami është për vajzat”). Komenti u bë në përgjigje të një postimi humoristik që trajtonte mënyrën se si njerëzit prezantojnë jetën e tyre online.
Më pas, Musk bëri edhe një koment tjetër ku ironizoi meshkujt që ndajnë ose dërgojnë profilet e tyre në Instagram gjatë bisedave, deklaratë që u shpërnda gjerësisht dhe shkaktoi reagime të shumta në rrjet.
Reagimet kanë qenë të ndara. Disa përdorues e kanë interpretuar si humor dhe stil tipik provokues të Musk, ndërsa të tjerë e kanë kritikuar për përforcim të stereotipeve gjinore.
Kjo nuk është hera e parë që Musk kritikon platformat e kompanisë Meta, në pronësi të Mark Zuckerberg. Ai ka pretenduar më herët se platforma e tij X favorizon diskutimet e hapura dhe informacionin në kohë reale, ndryshe nga Instagrami dhe Threads.
