Në arenën “Wiener Stadthalle” në Vienna po mbahet nata finale e Eurovision Song Contest 2026, ku Shqipëria u përfaqësua nga Alis Kallaçi me këngën “Nân”, një prej performancave më emocionale të mbrëmjes.
Artisti shqiptar u ngjit i pesti në skenë, duke sjellë një interpretim të ndjerë dhe intim të baladës që trajton lidhjen mes nënës dhe fëmijës, mallin dhe plagën e emigracionit. Performanca u pasurua edhe nga prania e aktores së njohur Rajmonda Bulku, e cila i dha interpretimit një dimension dramatik dhe artistik më të thellë.
“Nân” u prit me duartrokitje të gjata nga publiku në sallë dhe ka marrë reagime pozitive edhe në komunitetet ndërkombëtare të Eurovision-it, ku shumë fansa e kanë cilësuar Shqipërinë si një nga surprizat më të forta të këtij edicioni.
Pak para finales, Alis Kallaçi u bëri thirrje shqiptarëve brenda dhe jashtë vendit të mbështesin këngën shqiptare në televotim.
“Televotimi hapet sonte në 21:00! Jam mirënjohës për gjithë mbështetjen që po merr ‘Nân’. Mund të votoni Shqipërinë me kodin 05. Faleminderit që e keni bërë këtë këngë tuajën”, shkroi ai në rrjetet sociale.
Votimi për finalen mbetet i hapur gjatë gjithë performancave dhe mbyllet rreth 40 minuta pas interpretimit të këngës së fundit. Çdo person mund të votojë deri në 10 herë, ndërsa Shqipëria konkurron me kodin 05.
