Pas publikimit në JOQ reagon Ministria e Kulturës në lidhje me incidentin në kalanë e Gjirokastrës

Sipas ministrisë, nga verifikimi i kamerave të sigurisë rezulton se qytetari kishte hyrë në ambientet e kalasë nga zona e daljes, pa prerë biletë dhe duke shmangur radhën e vizitorëve. Në reagim thuhet se punonjësja e biletarisë i ka kërkuar të respektojë procedurat dhe të kryejë pagesën sipas rregullave në fuqi.

Ministria pretendon se më pas situata është tensionuar, ndërsa qytetari ka filmuar punonjësen dhe komunikimi ka vijuar me tone fyese dhe intimidimi, çka ka sjellë edhe ndërhyrjen e rojeve të sigurisë.

Në reagimin zyrtar theksohet se institucionet nuk do të tolerojnë deformimin e ngjarjeve apo cenimin e figurës së punonjësve që ushtrojnë detyrën sipas rregullave të administrimit të pasurive kulturore.

Megjithatë, publikimi i rastit nga JOQ Albania solli reagimin e menjëhershëm të institucioneve, ndërsa mbetet e rëndësishme që çdo qytetar të trajtohet me korrektësi dhe respekt. Sjelljet arrogante apo tensionet ndaj vizitorëve në ambiente publike nuk duhet të tolerohen në asnjë rast.