Efektivi i Policisë së Shtetit, Novruz Cenalia, i vrarë dy vite më parë në Fier, është rivarrosur këtë të shtunë në Varrezat e Dëshmorëve.
Në ceremoninë e organizuar morën pjesë drejtues të Policisë së Shtetit, familjarë, kolegë dhe përfaqësues institucionesh, të cilët nderuan figurën e efektivit që humbi jetën në krye të detyrës.
Gjatë ceremonisë u theksua se emri i Novruz Cenalisë do të mbetet pjesë e historisë së Policisë së Shtetit si një efektiv që sakrifikoi jetën gjatë ushtrimit të detyrës.
Po ashtu, u kërkua që drejtësia të shkojë deri në fund për autorët e krimit, duke e konsideruar ngjarjen si një goditje ndaj autoritetit të shtetit dhe rendit publik.
Novruz Cenalia u vra në maj të vitit 2023 në fshatin Baltëz të Fierit. Autor i ngjarjes ishte Azgan Mërnica, i cili qëlloi me armë ndaj efektivit të policisë dhe më pas u largua nga vendi i ngjarjes, derisa u arrestua nga autoritetet.
