Një qytetar i është drejtuar redaksisë së JOQ Albania duke denoncuar një situatë skandaloze që, sipas tij, ka ndodhur gjatë një vizite në kalanë e Gjirokastrës, një prej monumenteve më të rëndësishme kulturore dhe turistike të vendit.
Sipas denoncimit, qytetari është përballur me një sjellje arrogante dhe fyese nga punonjësja e biletarisë, e cila jo vetëm ka refuzuar t’i japë biletën, por edhe nuk e ka lejuar të futet brenda për të vizituar kalanë.
I irrituar nga mënyra se si është trajtuar, ai ka dërguar pranë redaksisë edhe një video ku, dëgjohet qartë gjuha dhe sjellja e papranueshme e punonjëses ndaj vizitorëve.
Kalaja e Gjirokastrës, ashtu si çdo pasuri tjetër kulturore në Shqipëri, nuk është pronë private e askujt dhe nuk mund të kthehet në vend ku qytetarët apo turistët përballen me arrogancë dhe pengesa për të hyrë. Monumentet e trashëgimisë kulturore janë pasuri publike dhe duhet të jenë të aksesueshme për çdo vizitor vendas apo të huaj që dëshiron t’i vizitojë.
Redaksia e JOQ Albania i bën thirrje institucioneve përgjegjëse të verifikojnë rastin dhe të marrin masa të menjëhershme për këtë sjellje, e cila dëmton jo vetëm qytetarët, por edhe imazhin e turizmit shqiptar.
