Nga Ministria e së Vërtetës.
Në një zhvillim që ekspertët e financave e quajtën “rrëfimi më i madh ekonomik që nga viti ’97”, Maksude Kadena, e njohur ndryshe si Sudja, është parë duke kërkuar falje për mëkatet e saj te gazetarja Grida Duma, e veshur si murgeshë në një ambient rrëfimi misterioz.
Burime pranë “Kishës së të Mashtruarve” bëjnë me dije se Sudja hyri në dhomën e rrëfimit e përlotur dhe me zë të dridhur tha: “Kam marrë kursimet e një populli të tërë… kam shkatërruar familje… kam bërë mëkate financiare pa fund.”
Ndërkohë, Grida Duma, me qetësinë e një murgeshe që ka dëgjuar shumë drama televizive, e dëgjoi në heshtje dhe më pas i vendosi dorën mbi kokë duke i thënë:
“Bijë… të falen mëkatet. Të pastrohet figura dhe shpirti yt. Tani ik e qetë.”
Sipas dëshmitarëve, në atë moment ra një heshtje mistike në ambient, ndërsa Sudja doli nga rrëfimi me fytyrë të qetë dhe me bindjen se më në fund “reputacioni i ishte larë”.
