Instagram ka prezantuar një opsion të ri të quajtur “Instants”, i cili sjell një format të ri për ndarjen e fotove të përkohshme brenda aplikacionit. Funksioni është i integruar si në aplikacionin kryesor, ashtu edhe në një aplikacion të veçantë me të njëjtin emër.
Ideja e “Instants” është që përdoruesit të mund të shkrepin dhe të ndajnë foto spontane, të cilat zhduken pasi shihen nga miqtë. Marrësit mund të reagojnë ose të përgjigjen ndaj imazheve, ndërsa fotot ruhen në arkivin personal të përdoruesit deri në një vit, me mundësi për t’u ripërdorur më vonë si përmbledhje në Stories.
Në aplikacionin kryesor të Instagram-it, “Instants” aksesohet nga seksioni i mesazheve (DM), përmes një ikone me foto në këndin e poshtëm. Funksioni nuk ofron filtra apo mjete editimi, përveç shtimit të një përshkrimi, dhe nuk lejon ngarkimin e fotove nga galeria. Përdoruesit mund të zgjedhin se me kë e ndajnë përmbajtjen, ndërsa ekziston edhe opsioni i anulimit përpara se fotoja të dërgohet.
