Rritja e qirave dhe produkteve të shportës, jeta në Tiranë 60% më shtrenjtë se në 2021

Tirana ka hyrë në një fazë ku çmimet po rriten shumë më shpejt se të ardhurat e shumicës së banorëve, duke e bërë gjithnjë e më sfiduese përballimin e jetesës për një pjesë të madhe të qytetarëve. Sipas të dhënave të platformës Numbeo, një barometër digjital që mbledh informacion mbi koston e jetesës në mbarë botën, çmimet e qirave dhe disa artikuj të shportës bazë janë rritur me rreth 60% në pesë vitet e fundit.

Në sektorin e banesave, qiratë në Tiranë kanë shënuar rritje të ndjeshme, duke u bërë një nga barrat kryesore financiare për familjet dhe të rinjtë profesionistë. Sipas statistikave të Numbeo, qiraja mesatare për një apartament me një dhomë gjumi (1+1) në qendër të qytetit ka kaluar nga rreth 41,835 lekë në vitin 2021 në rreth 66,656 lekë në vitin 2026, duke regjistruar një rritje prej rreth 59%. Kjo rritje lidhet kryesisht me kërkesën e shtuar nga të huajt dhe turistët, si dhe me rritjen e vlerës së pronës në tregun imobiliar.

Rritje të ndjeshme janë shënuar edhe në çmimet e ushqimeve bazë dhe shërbimeve të përditshme. Sipas të dhënave të Numbeo, 12 kokrra vezë janë shtrenjtuar nga 204 lekë në rreth 318 lekë, ndërsa një kilogram oriz i bardhë nga 129 në 199 lekë. Po ashtu, një vakt në një restorant ekonomik është rritur nga 611 lekë në rreth 800 lekë, ndërsa çmimi i kafesë apo kapuçinos ka shënuar rritje prej rreth 28%. Këto zhvillime tregojnë një rritje të përgjithshme të kostos së jetesës në kryeqytet, duke ndikuar në mënyrë të drejtpërdrejtë fuqinë blerëse të qytetarëve.